ഒരുമിച്ചൊരു യാത്ര

തുന്നിച്ച പുത്തനുടുപ്പുകള്‍ ചാലവേ
തെറ്റെന്നുടുപ്പിച്ചു നിര്‍ത്തിയ കുഞ്ഞുങ്ങള്‍
രാത്രിയായപ്പോളിതെങ്ങോട്ട് പോകുന്നു?
പത്തുവയസ്സുകാരിക്കൊരു സംശയം

ചോദ്യങ്ങളിന്നില്ല, പോകുന്നു നാമിന്നു
രാത്രിയില്‍ തന്നെ, പിണങ്ങണ്ട മക്കളേ
നേരം വെളുക്കുന്നതിന്‍ മുന്‍പ് തന്നൊരു-
ടാക്സി വരുമതില്‍ ദൂരേയ്ക്ക് പോകണം

വേഗം കഴിക്കുക ചോറും കറികളും
പിന്നീട് കിട്ടുമിന്നെല്ലാര്‍ക്കുമോരോരോ,
നല്ല രുചിയാര്‍ന്ന വാനിലയൈയ്സ്ക്രീമും
അമ്മൂമ്മയെക്കാണാനാണെന്നു നിശ്ചയം
ചൊല്ലിയിളയവള്‍, സന്തോഷമോടവേ
കുട്ടനെക്കൊണ്ടുപോകണ്ടവന്‍ ദുഷ്ടനാ-
നാണെന്നെ പിച്ചു,മടിക്കുമഹങ്കാരി
അമ്മൂമ്മയോട് പറയുമതെല്ലാം ഞാന്‍
നോക്കിക്കോ നീ മോനേ കുട്ടാ

ചേട്ടനിതെന്താണൊരുങ്ങാത്തതിന്ന്, നാം
നേരത്തെ ചൊല്ലിയതെല്ലാം മറന്നുവോ?
ഇന്നെങ്കിലുമൊന്നു നിര്‍ത്തുമോ നിങ്ങടെ-
യൊട്ടും സഹിക്കാത്ത നാശപ്പുകവലി?
എന്തെങ്കിലുമൊന്നു തീരുമാനിക്കുക
പിള്ളേര്‍ക്കുറക്കം വരുന്നുണ്ട്, നോക്കിക്കേ

എല്ലാര്‍ക്കും കൂടെയൊരൊറ്റയെഴുത്തി-
ലൊതുക്കണമല്ലെങ്കിലെന്തിത്ര ചിന്തിയ്ക്കാന്‍?
നാണിയമ്മയ്ക്ക് കൊടുക്കുവാനുള്ളത്‌
മാത്രമാ പാത്രത്തില്‍ വയ്ക്കണം പ്രത്യേകം
അയ്യോ, മറന്നതിരാവിലെയെത്തുന്ന
ചക്കിക്കവളുടെ ചട്ടിയില്‍ പാലില്ല
വച്ചിട്ട് വേഗം വരാമപ്പൊളേയ്ക്കുമാ
കുപ്പിയിലുള്ളത് ലേശം പകര്‍ത്തുക

അമ്മേ വിശക്കുന്നു, ചോറും കറികളു-
മെന്തേ കഴിക്കുവാനെത്താത്തതിന്നിനി?
അച്ഛനുരുട്ടി തരണമെനിക്കെന്ന്
വല്ലാതെ ശാഠൃം പിടിക്കുന്നു മൂത്തവള്‍
എല്ലാര്‍ക്കുമിന്നച്ഛന്‍ വാരിത്തരാമത്
നന്നായി വേഗം കഴിക്കണം മക്കളേ

അമ്മേയിതെന്താ എനിക്കിന്ന് രാത്രിയില്‍
വല്ലാതെ തോന്നുന്നു വേണ്ടയീ ഐസ്ക്രീം
കുട്ടനിതെന്താ തികട്ടി വരുന്നത്,
പേടിക്ക വേണ്ട നീ കുട്ടാ.

പെട്ടന്നുറങ്ങുക മക്കളേ നാമിന്നു
നേരത്തേ തന്നെ പുറപ്പെടും രാവിലെ
അമ്മതന്നുമ്മകള്‍ വാങ്ങിയ കുഞ്ഞുങ്ങള്‍
പാതിമിഴികളടച്ചു മയങ്ങിയോ?

വേഗമാകട്ടിനി നമ്മള്‍ക്കുമെത്തണം
ആരും കടക്കാത്ത മായിക ലോകത്തില്‍!
പേടിക്ക വേണ്ടയീ ലോകത്തിലെ വെറും
ബാലിശമായ കണക്കും കടങ്ങളും!